Die Oudtshoorn Jukskeiklub het Saterdag 21 Februarie aan Danabaai se gewilde Opedag in Hartenbos deelgeneem, waar altesaam 22 spanne om die eer meegeding het. Die kompetisie is in twee afdelings beslis, met ses spanne in die B-afdeling en 16 spanne in die C-afdeling.
Die dag is gekenmerk deur warm en drukkende toestande, maar dit het geensins die entoesiasme en mededingingsgees van die spelers beïnvloed nie. Van vroeg af was daar ’n positiewe atmosfeer op die bane, met spanne wat hul beste gelewer het in ’n gees van goeie sportmanskap.
Oudtshoorn se B-span het hul man gestaan teen sterk teenstanders in hul afdeling. Met deeglike spanwerk en volgehoue konsentrasie het hulle deurgaans kompeterend gebly en uiteindelik ’n vyfde plek behaal — ’n goeie prestasie in ’n uitdagende afdeling.
Die klub se C-span, wat as ’n betreklik nuwe kombinasie beskou word, het ook waardevolle ondervinding opgedoen. Ten spyte van hul beperkte ervaring het die spelers vasberade gespeel en as ’n hegte eenheid saamgewerk. Hulle het die kompetisie in die tiende plek afgesluit, ’n verdienstelike uitslag wat op goeie potensiaal dui.
Die deelname aan die Opedag het nie net vir mededinging gesorg nie, maar ook vir die verster-king van bande tussen spelers en klubs in die streek. Die Oudtshoorn Jukskeiklub kan trots wees op hul vertoning en sien met vertroue uit na die res van die seisoen. (GRANWILLE GOLIATH)