Jong ster Ava Giles maak golwe in moderne vyfkamp

Ava Giles, ’n graad 2-leerder van Laerskool Wesbank, is besig om vinnig naam te maak in die wêreld van moderne vyfkamp-dissiplines soos Laser Run, Biathle en Triathle. Sedert sy eers in Februarie vanjaar met hierdie sportsoorte begin het, het sy reeds indrukwekkende hoogtes bereik.

Met haar natuurlike talent en harde werk het Ava haarself as Eden- en Wes-Kaapkampioen gevestig in al drie dissiplines in die o.9-afdeling. Hierdie prestasies is merkwaardig vir so ’n jong atleet en getuig van haar toewyding en deursettingsvermoë.

Ava het Eden ook verteenwoordig by die Tweekamp SA-byeenkoms wat op 20 en 21 Maart in Oudtshoorn plaasgevind het. Hier het sy waardevolle ervaring opgedoen teen van die land se beste jong deelnemers, wat haar selfvertroue en vaardighede verder versterk het.

Haar volgende groot uitdaging wag reeds, aangesien sy Suid-Afrika gaan verteenwoordig by die Afrika Laser Run Kampioenskappe wat op 3 Oktober in Kaapstad plaasvind. Hierdie ge-leentheid bied vir Ava die kans om haar talent op ’n internasionale verhoog te wys.

Die jong atleet is ook veelsydig op die sportveld.

Sy speel tans vir die eerste hokkie- en netbalspan en het boonop ’n groot liefde vir tennis.

Met haar vasberadenheid en passie vir sport lyk die toekoms baie belowend vir hierdie jong ster. Ava Giles is beslis ’n naam om dop te hou. (GRANWILLE GOLIATH)

• 
• 
• 
•