Die Infanterieskool se sportgronde was op Saterdag 31 Januarie die middelpunt van plaaslike sokkeraksie toe Infantry School FC twee belangrike wedstryde op eie bodem gespeel het. Ondersteuners het in goeie getalle opgedaag om hul span aan te moedig in wat ’n dag van gemengde uitslae sou wees.
In die eerste wedstryd om 10:00 het Infantry School FC teen Paris United FC te staan gekom.
Die tuisspan het van vroeg af hul stempel op die wedstryd afgedruk met goeie balbesit en georganiseerde spel.
Hul druk het vrugte afgewerp toe hulle twee doele aanteken sonder om terug te staan. Die 2–0 oorwinning was ’n verdienstelike uitslag en ’n bewys van die span se groei en dissipline op die veld.
Paris United FC het dapper probeer terugveg, maar die verdediging van Infantry School FC het stewig gestaan.
Die tweede wedstryd om 14:00 het egter ’n moeiliker toets vir die tuisspan ingehou toe hulle teen Simunye FC te staan gekom het. Albei spanne het met groot intensiteit gespeel, en Infantry School FC het eerste die telbord laat rol met ’n goed afgeronde doel.
Simunye FC het egter sterk teruggekom en twee doele aangeteken om uiteindelik met ’n 2–1 oorwinning weg te stap. Ten spyte van die nederlaag het Infantry School FC tot die eindfluitjie geveg en karakter getoon.
Die aandag skuif nou na die volgende wedstryde wat op 7 Februarie by die Infanterieskool se sportgronde plaasvind. Die oggendwedstryd om 10:00 sal Oriented Birds FC in aksie sien, gevolg deur Bitou Young Pirates wat om 14:00 afskop.
Intussen sal die jong talent ook hul kans kry om te skitter by die Juniors B-veld, waar die o.17-spanne van Alpha FC ODN en Dysselsdorp FC mekaar om 12:00 die stryd aansê.
Ondersteuners word aangemoedig om die wedstryde by te woon en plaaslike sokker te ondersteun, aangesien dit nie net kompetisie bevorder nie, maar ook gemeenskapsgees versterk. (GRANWILLE GOLIATH)