Van Oudtshoorn tot die Moulin Rouge: Sebas Meyer tree ná 37 jaar af

Volstruisvere het Sebastian Meyer van Oudtshoorn, met die karnavalwêreld van Rio de Janeiro, die Moulin Rouge en van Europa se bekendste modehuise verbind. Aan die einde van November tree hy ná 37 jaar by Cape Karoo International (CKI) se veerafdeling af

“Wanneer ek terugkyk vanuit Oudtshoorn na die res van die wêreld, voel ek ongelooflik bevoorreg om my loopbaan te kon deurbring met iets waarvoor ek opreg lief was. Volstruisvere het my op ’n ongelooflike reis geneem en my voorgestel aan van die mees kreatiewe mense en bedrywe ter wêreld,” skryf Meyer.

Deur die jare het hy karnavalkliënte in Rio de Janeiro en elders in Suid-Amerika en Europa bedien, asook kabaretkliënte soos die wêreldbekende Moulin Rouge. In die modebedryf het hy met ontwerpers en modehuise in Europa en die Verenigde Koninkryk gewerk, onder meer met handelsmerke soos Dior, Chanel en Valentino. Onder sy kliënte was ook militêre kliënte en hoedemakers wat hoede vir koninklikes ontwerp.

Vir Meyer lê die bekoring van ’n volstruisveer in sy natuurlike beweging, sagte tekstuur en die manier waarop dit ’n ontwerp kan afrond. Hy het dit deur die jare in uiteenlopende skeppings gesien, van kleurvolle karnavalkostuums tot verfynde mode- en kabaretuitrustings.

“Vir 37 jaar het volstruisvere my verbind met ’n wêreld van kreatiwiteit, skoonheid en merkwaardige mense. Dit was ’n voorreg om deel van daardie verhaal te wees,” skryf hy.

Wanneer Meyer terugkyk, staan die mense agter die vere vir hom uit. Baie van die kollegas, kliënte en verskaffers met wie hy gewerk het, het oor die jare dierbare vriende geword.

Hy bedank hulle vir hul vertroue, ondersteuning en vriendskap en sê hy sal die kreatiwiteit, die lag en die daaglikse kontak met hulle mis.

“Aftrede is bloot ’n nuwe avontuur,” sluit hy af.

• 
• 
• 
•