DIE vooraanstaande buitelug- en sportdragverskaffer First Ascent het hom verbind tot ’n vennootskap met Dryland Event Management, ’n onderneming wat op Oudtshoorn gesetel is en onder meer verskeie van Suid-Afrika se voorste bergfietswedrenne en veldwedlope aanbied.
First Ascent behoort aan Performance Brands wat ook handelsmerke soos Capestorm, Second Skins en African Nature besit.
Die vennootskap het tot gevolg dat Dryland van First Ascent se produkte vir onder meer hul personeel en deelnemers aan hul byeenkomste gebruik. Dit sluit in dra- en rugsakke, tente, reën- en wintersklere en tegniese sporttoerusting. Dryland bied sewe jaarlikse bergfietsrywedrenne aan, naamlik die Momentum Health Attakwas Extreme, Momentum Health Tankwa Trek, 36ONE MTB Uitdaag, Glacier Cradle Traverse, Glacier Storms Rivier Traverse, Ladismith Cheese 7Weekspoort MTB Uitdaag en Momentum Health Cape Pioneer Trek. Biogen is by drie van die wedrenne betrokke as borg van sportaanvullings.
Henco Rademeyer, medestigter van Dryland, sê First Ascent is bekend daarvoor dat hul tegniese sporttoerusting en drag van hoë gehalte is.
“Deurdat hulle hul produkte teen billike pryse aanbied, maak hulle sportsoorte soos bergfietsry en veldwedlope meer toeganklik.
“Ons het ’n baie soortgelyke bena-dering deurdat ons onvergeetlike Suid-Afrikaanse buitelugervarings teen billike tariewe aanbied,” sê hy.
Stuart Young, hoofuitvoerende beampte van Performance Brands, sê hulle is baie opgewonde om met Dryland in vennootskap te gaan as amptelike borg van sportdrag en bagasie (luggage). “Dryland se byeenkomste, wat toegewyde en geesdriftige sportlui lok, vind aanklank by ons,” sê hy.
