Wat beteken dit wanneer die raad in reses gaan? Watter tale mag tydens ’n vergadering gebruik word, en watter gedragsreëls geld in die raadsaal?
Die Oudtshoorn Munisipale Raad se vergaderings word deur ’n stel reëls en prosedures gere-guleer waarvan inwoners waarskynlik nie altyd bewus is nie. Hier is ’n paar interessante feite.
Het jy geweet?
- Drie tale kan in die raadsaal gebruik word. Afrikaans, Engels en isiXhosa mag tydens vergaderings van die Oudtshoorn Munisipale Raad gebruik word.
- Die raad moet minstens een keer per kwartaal vergader. Die Speaker moet toesien dat die vereiste raadsvergaderings plaasvind.
- Raadsvergaderings het streng gedragsreëls. Raadslede, munisipale werknemers en lede van die publiek moet orde handhaaf. Hulle mag nie die vergadering ontwrig, onwelvoeglik optree, aanhoudend dieselfde argumente herhaal of beledigende en lasterlike opmerkings maak nie.
- Reses beteken nie dat die munisipaliteit sluit nie. Wanneer die raad in reses gaan, word die gewone formele vergaderingsprogram vir ’n tydperk onderbreek. Die munisipale administrasie en dienslewering gaan egter voort en dringende sake kan steeds hanteer word.
- Die raad en administrasie het verskillende rolle. Die raad neem politieke en beleidsbesluite, terwyl die munisipale administrasie verantwoordelik is vir die uitvoering daarvan en die daaglikse bestuur van munisipale funksies.