Mnr en Mej Struisie 2020 – meer as optof en krone

Imogen Fourie - met haar skouspelagtige volstruisveerkroon - en Aziz Jantjies wat op 4 September gekroon is gekroon as die Hoërskool Oudtshoorn se Mej en Mnr Struisie. Lees meer oor hoe die skool op kreatiewe wyse met aanlyn-videos vanjaar se kompetisie aangebied het. Foto verskaf

Van die Mej Struisie-finaliste in een van die 13 videos wat in die Oudtshoorn-omgewing geskiet is waarin vanjaar se Mnr en Mej Struisie-kompetisie aanlyn aangebied is. Dié aandrokke is van die ontwerper Christiaan Ras. Die videos kan gekyk word op die skool se Facebook-bladsy: Oudtshoorn Hoërskool. Foto verskaf

VOLSTRUISVEERKRONE, die skoon­­heid van die Klein Karoo en hope kreatiwiteit.

Dit is vanjaar van die kenmerke van die Hoërskool Oudtshoorn se besonderse Mnr en Mej Struisie-kompetisie wat verlede Vrydag (4 September) met die kroningsgeleent­heid by Buffelsdrift ten einde geloop het.

Maryke Botha, die Hoërskool Oudtshoorn se bemarker, sê die skool wou vanjaar ’n plan beraam om dié jaarlikse kompetisie waaraan matriekleerders kan deelneem, te laat voortgaan en ook blootstelling aan die dorp en toerismebesienswaar­dig­hede te gee.

“Ekonomiese druk kon nie die Struisies kniehalter nie en die goedgunstigheid van die gemeenskap het hierdie droom van ons ’n werklikheid gemaak.

“Vanjaar se Mnr en Mej Strui­sie-projek was meer as net ’n spog­geleentheid vir die skool, maar wil ook ’n simbool van hoop vir die gemeenskap van Oudtshoorn wees.”

Dertien videos met die 22 finaliste is as deel van die kompetisie by ver­skeie toerismebesienswaardighede en bakens in en rondom Oudts­hoorn geskiet, soos Arbeidsgenot, Pinehurst, die CP Nel Museum en Safari Volstruisplaas, asook by verskeie plekke wat die skoonheid van die Klein Karoo-landskap toon.

Dié videos is oor die laaste aantal weke op sosiale media gedeel en reeds landwyd deur mense gekyk.

Die skool het ook as deel van die kompetisie verskeie gemeenskaps­projekte geloods by Klipdrift Pri­mêr, die Association for Persons with Disabilities (APD) Dagsorg, Helen Bel­linghanhof asook by die Eljada In­stituut.

Volgens Botha sal die wenners van Mnr en Mej Struisie 2020 voortgaan om die gemeenskapsprojekte te ondersteun en die beeld van die skool en dorp uit te dra.

• Die wenners van vanjaar se Mnr en Mej Struisie-titels is Aziz Jantjies en Imogen Fourie.

Ali Nait-Sadie is aangewys as Mnr Ad Astra en Khanyisa Matshaka as Mej Ad Astra, ’n toekenning vir deelnemers wat nie bang was om uit hul gemaksone te tree en die geleentheid met albei hande aan te gryp nie. Hier­die is ’n nuwe toekenning wat vanjaar ingestel is en is afgelei van die skool se leuse Ad Astra, wat “reik na die sterre” beteken.

Die ander wenners is Nimo van der Merwe (eerste pluimprins) en Ruby-Ann van Heerden (eerste vereprinses) gevolg deur Hanrü Storm (tweede pluimprins) en Chrizanne Human (tweede vereprinses).

Hanrü is ook aangewys as Mnr Fotogenies en Hybre Hefke as Mej Fotogenies.

Druwan Lashawa is aangewys as Mnr Persoonlikheid en Mekayla Greyling as Mej Persoonlikheid. (Deur Christine Schoeman en Liesel le Roux)