Motoriste is Woensdag 6 Mei met ’n skerp styging in brandstofpryse gekonfronteer, met petrol wat met R3,27 per liter gestyg het, terwyl diesel aanvanklik met meer as R6 per liter verhoog is.
Die Departement van Minerale en Petroleumhulpbronne moes egter later ’n fout in sy dieselberekening erken nadat dit geblyk het dat die oorspronklike dieselverhoging verkeerd bereken is. Die aanvanklik aangekondigde styging van R6,19 per liter vir diesel is later aangepas na R5,27 per liter.
Volgens die departement het die fout ontstaan nadat slegs 0,93 sent van die dieselheffing afgetrek is, in plaas van die bedoelde 93 sent. Dit het die dieselverhoging byna R1 per liter hoër laat lyk as wat dit moes wees.
Die departement het erken die fout het onnodige verwarring veroorsaak, en daarvoor om versko-ning gevra.
Die jongste brandstofaanpassings kom te midde van voortgesette druk op internasionale oliepryse, grootliks weens konflik in die Midde-Ooste en ontwrigtings in wêreldwye energievoorrade.
Hoewel die regering tydelike verligting op die algemene brandstofheffing ingestel het om die impak op verbruikers te beperk, is daar reeds gewaarsku dat dié verligting oor die volgende twee maande uitgefaseer sal word.
Met brandstofkoste wat steeds styg, word motoriste aangemoedig om brandstofbesparings-wenke toe te pas.
Wenke om brandstof te bespaar:
- Hou jou bande behoorlik opgepomp
- Vermy vinnige wegspring en harde rem
- Beperk onnodige ritte
- Verwyder swaar items uit jou voertuig
- Laat jou voertuig gereeld diens
- Ry teen ’n konstante spoed waar moontlik
- Skakel die voertuig af wanneer jy lank stil staan.