BORGTOG is Vrydag in die Oudtshoorn Landdroshof op Oudtshoorn aan een van vyf verdagtes van Dysselsdorp wat tereg staan op twee klagtes van menseroof en twee klagtes van poging tot moord, geweier. Walter Abrahams (21), Patrick Prins (29), Deshwill Lingerveld (35), Tadeo Sibanda (27) en ’n 16-jarige word daarvan aangekla dat hulle op 26 Oktober twee mans, Lee Marco Tamboer (26) en Adriaan Hector (26), in die kattebak van ’n motor ingedwing en later met ’n spanhoutjie, graaf en bierbottels geslaan, met ’n skroewedraaier gesteek en ook geskop en getrap het.
Die staatsaanklaer, Brandon Smith, het borgtog vir Sibanda teengestaan op grond van ’n hangende lasbrief vir sy inhegtenisneming op ’n moordklag in Upington. Hy of van sy familie het glo ook al probeer om staatsgetuies om te koop.
Volgens Sibanda se regsverteenwoordiger, adv Shaun Ferreira, het sy kliënt as gevolg van ’n misverstand nie vir sy hofverskyning in Upington opgedaag nie omdat hy glo gehoor het die saak is van die hofrol geskrap.
Landdros Marvin de Vos het Sibanda se borgtog geweier, maar wel borgtog van R1 000 toegestaan aan Abrahams wie se regsverteenwoordiger, Gideon Badenhorst, aangedui het dat hy geen hangende sake teen hom het nie en nie ’n vlugrisiko is nie.
Prins en Lingerveld het nie om borgtog aansoek gedoen nie terwyl die minderjarige op waarskuwing in die sorg van sy moeder geplaas is. (Deur Garnett Wicomb)
