Deur Liesel le Roux
Daar was die afgelope week sowaar inwoners van Oudtshoorn wat gekla het omdat die munisipaliteit R100 000 bewillig het om die afgelope Sondag se SuperSport-rugbyfees op die dorp moontlik te maak.
Die klagtes mag uit onkunde spruit, of bloot uit ’n negatiewe houding teenoor alles wat die Oudtshoorn Munisipaliteit doen.
Die wat kla, verstaan nie dat die munisipaliteit deur hul bydrae – eintlik maar ’n druppel in die emmer van die koste om so ’n nasionale byeenkoms aan te bied – dit moontlik gemaak het dat miljoene rande die dorp binnegekom het; dat Oudtshoorn op TV bemark is, en dat inwoners gratis ’n topsportbyeenkoms kon bywoon.
Toerisme – wat sporttoerisme en kunstefeeste insluit – dra Oudtshoorn ekonomies. Ons as inwoners moet besef dat sulke byeenkomste mense na Oudtshoorn bring en dat dit dié plattelandse dorp help om te oorleef. Al die gereelde byeenkomste op die dorp skep werkgeleenthede, hou besighede se deure oop (en beskerm so mense se werk) en is een van die dinge wat Oudtshoorn so ’n lekker dorp maak om in te woon.
Oudtshoorn is die ideale tuiste vir groot sportgeleenthede. Daar is genoeg kundigheid op die dorp om ’n groot byeenkoms aan te bied; in groot mate as gevolg van die KKNK en talle ander groot sportbyeenkomste die afgelope dekades. Die dorp se infrastruktuur help ook om sulke byeenkomste na die dorp te trek.
Dit was ook deel van die Suid-Afrikaanse Rugbyunie (SARU) se motivering om so ’n prominente byeenkoms na die Klein Karoo te bring.
Volgens Hennie Baartman, president van die SWD Rugbyunie, het ’n landwye opname wat deur SARU gedoen is, bevind
Oudtshoorn se geriewe, die ondersteuning van die ge- meenskap en die plaaslike munisipaliteit sowel as toeskouergetalle is die beste in die land.
Dit is tog seker iets waarop elke inwoner trots kan wees.
Die Oudtshoorn Munisipaliteit het ’n keuse gehad om nee te sê vir dié Supersport-byeenkoms. Gelukkig het hulle die geleentheid aangegryp.
• Dankie aan almal wat die wintervakansie met ’n glimlag gewerk het om verskeie groot sportgeleenthede suksesvol op die dorp aan te bied. Oudtshoorn en sy inwoners is julle groot dank verskuldig!