Francois Gerber besig om te skilder, dit waarvoor hy die liefste was. Foto verskaf
Deur Angelique Erasmus
’N BEKENDE kunstenaar van Oudtshoorn, Francois Gerber, is Sondag oorlede nadat hy sy stryd teen kanker verloor het.
Gerber is in 1956 in Port Elizabeth gebore, en het sy kunsstudie aan die Universiteit van Stellenbosch (US) voltooi.
Hy was bekend in kunskringe vir sy skilderye van stillewes, maar het ook dikwels landskappe en gesigstudies gedoen. Hy was lief daarvoor om met potlood te skets, maar het ook verskillende mediums soos pastel en olieverf gebruik. In later jare het hy ook ’n reeks narre geskets, en het hy beoog om ook met beeldhouwerk te begin.
Sy kunswerke is regoor Suid-Afrika uitgestal, maar meeste van sy kunswerke was eksklusief te sien in ’n kunsgalery in Robertson.
Gerber se kunswerke maak ook deel uit van talle privaatversamelings.
Hy het ’n groot gedeelte van sy lewe in Oudtshoorn gebly.
Gerber het geen kinders gehad nie.