Rugbyliefhebbers wat die afgelope naweek die Oudtshoorn Rugbyklub se tuiswedstryde bygewoon het, is op twee opwindende vertonings van aanvallende rugby getrakteer toe die tuisspan vir Knysna Kaveliers op eie bodem ontvang het.
Van die eerste afskop af was dit duidelik dat Oudtshoorn vasberade was om die maksimum punte voor hul tuisondersteuners te verower.
Die dag het begin met ’n naelbytstryd tussen die tweede spanne, waar die wedstryd tot die laaste minuut in die weegskaal gehang het. Oudtshoorn se 2de span het egter karakter en deursettingsvermoë getoon om ’n skitterende 30-29 oorwinning te behaal. Die eenpuntsege het die toeskouers op die punte van hul stoele gehou en die geesdrif langs die veld aangevuur.
Die hoogtepunt van die dag was egter die botsing tussen die twee eerste spanne. In ’n wedstryd wat deur aanvallende flair, vinnige balhantering en ’n vlaag drieë gekenmerk is, het Oudtshoorn se 1ste span hul stempel afgedruk met ’n indrukwekkende 71-43 oorwinning.
Die tuisspan het van oral op die veld aangeval en hul ondersteuners met ’n ware rugbyfees vermaak.
Die oorwinning beklemtoon die uitstekende vorm waarin die klub tans verkeer. Spelers het nie net individuele briljantheid getoon nie, maar ook die waarde van spanwerk en dissipline onder druk bewys. Die afrigtingspan se voorbereiding en strategie was duidelik sigbaar in die manier waarop die span die wedstryd beheer het.
Klubbestuur het hul waardering uitgespreek teenoor die spelers vir hul harde werk en veggees, asook teenoor die getroue ondersteuners wat die span week ná week aanmoedig.
Met hierdie dubbele oorwinning agter hul naam verskuif die fokus nou na die laaste wedstryd van die eerste rondte. Oudtshoorn sal weer op hul tuisveld in aksie wees wanneer hulle Seagulls ontvang.
Die span is vasbeslote om die eerste helfte van die seisoen op ’n hoë noot af te sluit en hoop dat die gemeenskap weer in groot getalle opdaag om hulle te ondersteun.
Die boodskap is duidelik: Oudtshoorn Rugby-klub bou momentum, en die seisoen raak al hoe meer opwindend. (GRANWILLE GOLIATH)
Oudtshoorn Rugbyklub laat Knysna buig in doelteryke tuisoorwinnings
Foto verskaf.