Oudtshoorn RFC is tans besig om hulself stewig te vestig as een van die dorp se
gunstelingrugbyspanne. Met week na week se indrukwekkende vertonings wys die span dat harde werk en toewyding wel vrugte afwerp. Ondersteuners stroom toenemend saam om hierdie span in aksie te sien, en hulle stel selde teleur.
Die afgelope Saterdag het Oudtshoorn RFC weer hul staal gewys toe hulle teen Albertina RFC te staan gekom het. Die B-span het ’n sterk en gestruktureerde wedstryd gelewer en uiteindelik met 29-18 as wenners uit die stryd getree. Hul spel is gekenmerk deur goeie samewerking en dissipline, wat hulle in staat gestel het om die wedstryd te beheer.
Die A-span het egter die dag gesteel met ’n uitmuntende vertoning van hoë gehalte rugby. Van die eerste fluitjie af het hulle die tempo bepaal en Albertina RFC onder geweldige druk geplaas. Met uitstekende aanvalspel en rotsvaste verdediging het Oudtshoorn RFC hul teenstanders oorrompel en ’n oortuigende oorwinning van 74-18 behaal.
Hierdie resultate bevestig dat Oudtshoorn RFC ’n krag is om mee rekening te hou. Indien hulle hierdie vorm kan volhou, wag daar beslis nog groot dinge vir die span hierdie seisoen. (GRANWILLE GOLIATH)
Oudtshoorn RFC hou aan beïndruk met dominante vertonings
Foto verskaf