Oudtshoorn jukskei wys hul krag by Mosselbaai sportfees

Die Oudtshoorn Jukskeiklub het die afgelope naweek hul merk gemaak tydens die gewilde Mosselbaai Sportfees, waar drie spanne van die klub deelgeneem het. Die fees, wat jaarliks talle sportlui van regoor die streek lok, het weer eens ’n platform gebied vir mededingende sport en goeie samehorigheid.

Die Oudtshoorn-spanne het hul staal gewys teen sterk opposisie en met groot entoesiasme en toewyding deelgeneem. Spelers het deurentyd goeie tegniek en spanwerk ten toon gestel, wat die klub se groei en ontwikkeling duidelik weerspieël. Die aangename weersomstandighede het bygedra tot ’n suksesvolle dag op die bane, waar spelers en toeskouers die sport ten volle kon geniet.

’n Besonderse hoogtepunt van die naweek was die deelname van vyf leerders van Laerskool Van Reede, wat as ’n uitnodigingspan deelgeneem het. Hierdie jong spelers het hul uitstekend van hul taak gekwyt en waardevolle ervaring opgedoen deur teen meer ervare deelnemers mee te ding.

Hul entoesiasme en deursettingsvermoë het nie ongesiens verbygegaan nie, en hulle is beloon met medaljes vir hul deelname – ’n prestasie waarop hulle trots kan wees.

Die klub is veral trots op die jong talent wat besig is om deur die geledere te groei. Geleenthede soos die Mosselbaai Sportfees speel ’n belangrike rol in die ontwikkeling van spelers en help om die sport van jukskei verder uit te bou en te bevorder.

Die Oudtshoorn Jukskeiklub wil alle spelers gelukwens met hul deelname en uitstekende sportmanskap. Dank word ook uitgespreek aan die organiseerders van die fees vir ’n goed gereëlde geleentheid.

Die klub sien daarna uit om in die toekoms weer aan soortgelyke byeenkomste deel te neem en hul passie vir jukskei verder uit te leef. (GRANWILLE GOLIATH)

• 
• 
• 
•