Bo: Ruan Louw (21) word Saterdag op die botsingstoneel behandel. Onder: Die Mercedes Kompressor wat in die botsing betrokke was.
Foto’s verskaf
Deur Liesel le Roux
’N 21-JARIGE motorfietsryer het Saterdag wonderbaarlik ernstige beserings vrygespring toe sy motorfiets omstreeks 10:30 op die hoek van Baron van Reede- en Van der Rietstraat op Oudtshoorn in ’n botsing was met ’n silwer Mercedes Kompressor.
Die polisie kon nie bewerings bevestig dat die Mercedes oor ’n stopteken by dié kruising gery het nie. Daar is stoptekens aan beide kante van Van der Rietstraat waar dit Baron van Reedestraat kruis.
Ruan Louw (21) van Oudtshoorn het vanuit die rigting van George in Baron van Reedestraat gery en die Mercedes in Van der Rietstraat vanuit die rigting van Oudtshoorn-Noord.
Die impak van die botsing was so groot dat die Kompressor se buffer afgeruk is en dit omgeswaai en met sy neus uit die rigting waarvandaan dit gekom het, op die sypaadjie tot stilstand gekom het.
Ruan is op die toneel deur ambulanspersoneel behandel voordat hy hospitaal toe geneem is vir observasie en X-strale. Hoewel aanvanklik gevrees is dat hy nek- of rugbeserings opgedoen het, het hy slegs ’n groot kneusplek op sy rug van die botsing oorgehou.
Volgens kapt Louis Visser, woordvoerder van die Oudtshoorn Polisie, ondersoek die polisie ’n saak van roekelose en nalatige bestuur, maar is daar bot- sende weergawes oor wie van drie insittendes die voertuig bestuur het.
“Daar was nie op die toneel enige aanduiding wie die voertuig bestuur het nie. Gedurende die ondersoek sal ooggetuies se verklarings bekom word en ons sal ons laat lei deur die getuienis.”
Visser sê indien getuienis daarop dui dat die bestuurder onder die invloed was, sal so ’n klagte bygevoeg word.
• Dié straathoek en gedeelte van Baron van Reedestraat tussen die verkeerslig by Kerkstraat en die uitgang na die Kango Grotte is berug vir botsings. Twee motorfietsryers van Oudtshoorn het die afgelope jare nie te ver van die straathoek nie gesterf. Die eienaar van Alz-Du Konstruksie, Dirk van Niekerk, is in 2016 oorlede, twee weke nadat hy op 14 Maart in ’n botsing by die kruising met St Saviourstraat betrokke was, terwyl Zander van der Zandt (16) op 19 Februarie 2014 gesterf het toe hy in ’n botsing naby die kruising met Hoopstraat betrokke was.
Die Wes-Kaapse Departement van Vervoer skenk tans aandag aan die veiligheid van die straat. Sien ook lesersbrief op bladsy 4.