• Wat behels die inperking (lockdown)? Dit beteken basies dat alle inwoners Donderdagaand vanaf 23:59 uur in hul huise moet bly, tensy hulle ’n noodsaaklike diens doen of kos en mediese dienste nodig het.
• Watter plekke sal nog oop wees? Supermarkte, apteke, bankdienste, vulstasies, mediese en nooddienste. Mense wat die voorskrifte van die inperking oortree, sal ’n boete of tot een maand tronkstraf opgelê word.
• Mag ek by vriende gaan kuier in hul huis? Suid-Afrikaners moet in hul huise bly tydens die inperking en mag nie oor en weer kuier nie.
• Mag ek vir oefening gaan stap of draf, en mag ek my hond saamvat? Die antwoord hierop is nog onseker met teenstrydige uitsprake die week.
• Wat word van mense op straat? Daar is klaarblyklik wel planne vir diegene op straat wat geen heenkome het nie. Dennis Nghonyama, bestuurder van die Departement Maatskaplike Ontwikkeling, op Oudtshoorn, het gister gewag vir terugvoer van hul hoofkantoor oor dié aspek.
• Wat van begrafnisse? Aansoeke moet by die munisipaliteit se rampbestuursafdeling ingedien word voordat begrafnisondernemers mense mag begrawe.
