’n Gemeenskapsprojek wat reeds meer as ’n dekade lank ’n verskil maak, hou steeds aan om hoop en waardes aan jong leerders oor te dra.
Die inisiatief, wat in 2013 deur die voormalige NG Kerk De Rust-leraar, ds. Hennie van Loggerenberg begin is, fokus daarop om Bybels aan graad 7-leerders in die omgewing te skenk.
Die projek se hoofdoel is om seker te maak dat elke graad 7-leerder ’n eie Bybel besit. Jaarliks ontvang leerders by drie skole binne die gemeente se grense ’n volledige Bybel, met hul naam persoonlik daarin geskryf.
Hierdie gebaar maak nie net die Bybel ’n waardevolle besitting nie, maar skep ook ’n gevoel van eienaarskap en trots.
Volgens die organiseerders is die projek meer as net ’n skenking – dit is ’n poging om Bybelse waardes onder jongmense te vestig.
In ’n tyd waar uitdagings soos wetteloosheid en ’n gevoel van hopeloosheid toeneem, word gehoop dat hierdie inisiatief ’n positiewe invloed op leerders se lewens sal hê.
Die projek word moontlik gemaak deur donasies en fondsinsamelings wat deur die NG Kerk De Rust gereël word. Gemeenskapslede speel dus ’n belangrike rol in die volhoubaarheid daarvan.
Daar is ook ’n uitnodiging aan die breër gemeenskap om betrokke te raak. Buiten finansiële bydraes, word ouers en inwoners aangemoedig om kinders te ondersteun en aan te moedig om die Bybel te lees en die waardes daarin toe te pas.
Met volgehoue ondersteuning bly hierdie projek ’n ligpunt in die gemeenskap en ’n belegging in die toekoms van jong mense.
