Historiese wandeltoer ’n reis na vorige eeue

OU geboue vertel wonderlike stories. Vra maar vir enigeen van die groot groep inwo­ners van Oudts­hoorn wat verlede Donderdag (17 Maart) ou ge­boue in Baron van Reede- en Kerkstraat besoek het tydens ’n informele wandeling wat gereël is deur Heritage Oudtshoorn Erfenis (HOE).

Met haar ongeëwenaarde kennis oor die ge­skiedenis van Oudtshoorn se ou geboue, het Hazel Gibson Jon­ker almal aan haar lippe laat hang oor die geskiedenis van die Oudtshoorn Presbeteriaanse Kerk (1921), die suksesvolle wamakersbe­sig­heid van die Deas-broers met hul erf wat tot by die Grobbelaarsrivier gestrek het (gevestig in 1875), Klass & Co (1947), Walmer House – eens ’n losieshuis en waar die kantore van Coetzee en Van der Bergh nou is, en Tom se Meule.

Hierna het die argitek Johan Smit meer vertel oor die argitektuur van geboue soos Prince Vintcent (1887), die Poskantoor (1955) en die Standard Bank (1904) in Kerkstraat en die invloed van die tydperke waaruit hulle dateer op hul argitektuur. Die aand is afgesluit met besoeke aan Prince Vintcent en die Standard Bank waar oor moontlike opsies vir toekomstige ontwikkeling gesels is. (Deur Liesel le Roux)

• 
• 
• 
•