Deur Garnett Wicomb
DIE verskuiwing van die Oudtshoorn Diereskut na die munisipale depot naby die Oudtshoorn Stasie is vir eers op ys geplaas na protes deur werknemers by die depot.
Die munisipale bestuurder, Allen Paulse, sê in ’n verslag wat tydens verlede Donderdag se raadsvergadering aan die raad voorgelê is, dat die werkers glad nie tevrede is met die verskuiwing na die depot nie omdat dit ’n gesondheidsrisiko inhou en daar nie met hulle gekonsulteer is nie.
Die raad het op grond hiervan die besluit om die skut na die depot te verskuif herroep, en die beplanningsdepartement van die munsipaliteit getaak om ’n alternatiewe geskikte perseel te vind.
Die raad het op 26 April vanjaar by ’n vergadering besluit om die skut te verskuif na ’n dringende versoek van die Wes-Kaapse Minister van Finansies, Ivan Meyer, dat die skut verskuif moet word van die huidige perseel langs die rioolwerke op die Kammanassie-pad.
In ’n brief van die werkersvakbond, Samwu, beskuldig werkers die munisipaliteit van onmenslike aksie en totale disrespek vir hul gesondheid en veiligheid.
Die werkers het ook ’n petisie aan die munisipaliteit oorhandig
Die grootste ongelukkigheid gaan oor kommmunikasie en die gesondheidsrisiko wat die skut vir die werkers inhou, het Paulse gesê.
Die aangeleentheid is op voorstel van raadslid Hendrik Ruiters, voorsitter van die gemeenskapsdienste-portefeuljekomitee, uitgestel tot die volgende raadsvergadering vir ’n besluuit oor ’n geskikte alternatiewe perseel.
