Prins Albert se munisipale raadslede het die oorhandiging van die nuwe voertuie en werktuig bygewoon. Van links is Margie Jaftha, Mark Steyn, Stoffel Botes (speaker), Linda Jaquet (onderburgemeester), Goliath Lottering (burgemeester), Suzanne Piedt en Elsabe Maans, en agter is Thulani Kompela (diensverskaffer) en Heinrich Mettler (munisipale bestuurder). Foto: Marlene Malan
Deur Marlene Malan
Die Prins Albert Munisipaliteit het pas bykans R1 miljoen se voertuie en ’n werktuig kontant aangekoop om dienslewering aan sy inwoners te verbeter.
Dié aankoop was moontlik weens nougesette geldbestuur, het die munisipale bestuurder, Heinrich Mettler, by die afleweringsgeleentheid verlede Vrydag aan Die Hoorn gesê. “Dié uitgawe sal dus geen negatiewe geldelike invloed op munisipale belastings hê nie.”
Vier bakkies ter waarde van R690 000 en ’n werktuig (“cherry picker”) vir oorhoofse dienste en herstelwerk (soos straatligte) van R285 000 is aangeskaf vanweë die slytasie van bestaande voertuie en bykomende munisipale behoeftes.
Die burgemeester, Goliath Lottering, het Mettler en sy span, onder andere Jannie Neethling (hoof: finan- siële dienste) en Anneleen Vorster (hoof: korporatiewe dienste), geluk gewens “met uitstekende geldbestuur, wat dit vir ons moontlik gemaak het om dié voertuie en werktuig kontant te koop. Ons kon dit doen deur middel van ons beleggings; ons hoef nêrens lenings aan te gegaan het nie. Ons administrasie het hard ge-werk om dit moontlik te maak.
“Ons wil dienslewering aan inwoners maksimaal verbeter, dit na ’n volgende vlak neem. Daarom gaan die munisipaliteit let op die versorging van die nuwe bates. Geen misbruik sal toegelaat word nie. Dit sal in ’n uitstekende toestand bly. Die ingeboude opsporingstelsels sal ons hiermee help.”
Die ouditeur-generaal het einde 2017 bekend gemaak dat die munisipaliteit ’n skoon ouditverslag vir 2016/2017 behaal het – die enigste in die Sentrale Karoo wat dié prestasie kon behaal. Lottering het toe gesê dat dié regmerk agter Prins Albert se geldbestuursvermoëns dit moontlik maak om infrastruktuur te verbeter, skuld te delg en kontantaankope te doen. Aan die einde van dié boekjaar het die munisipaliteit nagenoeg R20 miljoen na sy reserwefonds oorgeplaas.