’n Woord van dank en afskeid

Na bykans 27 jaar het die tyd aangebreek om afskeid te neem van Kleinplaas – ’n plek wat vir ons veel meer as net ’n besigheid was. Dit was ons tweede tuiste, ’n plek waar ons drome kon uitleef, lewenslange vriendskappe gesmee is en waar ons die voorreg gehad het om duisende mense te ontmoet.

Wanneer ons terugkyk oor hierdie ongelooflike reis, vul ons harte met dankbaarheid. Ons besef opnuut dat geen onderneming alleen suksesvol kan wees nie. Dit is die mense rondom jou wat die verskil maak.

Ons wil daarom ons opregte dank uitspreek aan elke gas en kliënt wat deur die jare vir Kleinplaas gekies het. Baie van u het nie net gereelde besoekers geword nie, maar deel van die Kleinplaas-familie. Dankie vir u lojaliteit, vertroue en die voorreg om deel van u vakansieherinneringe en lewensverhale te kon wees.

Aan al ons verskaffers, kontrakteurs en diensverskaffers: dankie vir die professionele diens, eerlikheid en vennootskappe wat oor soveel jare opgebou is. Julle ondersteuning het ’n onskatbare bydrae tot ons sukses gelewer.

Aan ons kollegas in die toerismebedryf, die Oudtshoorn- en Klein Karoo-gemeenskap, plaaslike besighede en organisasies: baie dankie vir julle samewerking, ondersteuning en vriendskap.

Saam het ons gewerk om ons dorp en streek as ’n besonderse bestemming vir plaaslike en internasionale besoekers te vestig.
’n Baie spesiale woord van dank gaan aan elke personeellid wat deur die jare deel van Kleinplaas was.

Julle harde werk, lojaliteit, vriendelikheid en toewyding het die hart van Kleinplaas gevorm.

Baie van julle het saam met ons deur uitdagings én hoogtepunte gestap, en daarvoor sal ons altyd dankbaar wees.

Ons wil ook ons opregte waardering uitspreek teenoor elke vriend, ondersteuner en familielid wat ons aangemoedig, gehelp en ondersteun het. Julle geloof in ons het ons dikwels die moed gegee om aan te hou wanneer die pad moeilik was.

Geen reis van bykans drie dekades verloop sonder uitdagings nie. Daar was moeilike tye, maar daar was soveel meer seëninge.
Ons is dankbaar vir elke geleentheid, elke les, elke handdruk, elke glimlag en elke herinnering wat ons vir altyd sal koester.

Terwyl ons hierdie hoofstuk af-sluit, doen ons dit met diepe dankbaarheid en vrede in ons harte. Ons was bevoorreg om vir bykans 27 jaar deel van Kleinplaas se verhaal te kon wees, en ons sal die herinneringe en die mense wat ons pad gekruis het, altyd saam met ons dra.

Ons wens die nuwe eienaars, bestuur en personeel alle voorspoed toe.

Mag Kleinplaas voortgaan om ’n plek van uitsonderlike gasvryheid, warm menseverhoudings en kosbare herinneringe vir nog baie jare te wees.

Aan elkeen wat op enige wyse deel was van ons reis – gaste, kliënte, verskaffers, personeel, vriende, familie en die gemeenskap – sê ons eenvoudig: Baie dankie!

Vir julle vertroue, julle ondersteuning, julle vriendskap en die voorreg om saam met julle hierdie besonderse reis te kon stap.

Mag God elkeen van u ryklik seën.
Met opregte waardering,
– David en Wilma Pienaar

• 
• 
• 
•