Links: Joan Nieman, voormalige radio-omroeper, lees uit Langenhoven se werk tydens die vieringe. Agter links is Jan Odendaal, bestuurslid van die Langenhoven Gedenkfonds. Foto: Liesel le Roux
DIE volksdigter CJ Langenhoven se verjaarsdag is verlede Vrydag met die hys van die landsvlag en ’n kranslegging by Arbeidsgenot, sy eertydse woonhuis wat as museum op Oudtshoorn bedryf word, gevier.
Leerders van Langenhoven Gimnasium op Oudtshoorn en die Hoërskool Langenhoven van Riversdal het die geleentheid bygewoon en bydraes gelewer. Die onder-hoofleiers van Langenhoven Gimnasium, Gert Nel en Helena van Heerden, het die vlaghysing waargeneem, terwyl Johan Mostert, hoofseun van die Hoërskool Langenhoven, die geleentheidspreker was.
Mariana Swanepoel wat altesame 26 jaar by Arbeidsgenot betrokke was, het ’n krans op Langenhoven se graf geplaas.
Verteenwoordigers van die Oudtshoorn Besigheidskamer en die toerismeburo het ook die funksie bygewoon.