Aksie in Saterdag se wedstryd tussen Langenhoven Gimnasium en die Hoërskool George wat op die Gimmies se veld plaasgevind het. George het die taai wedstryd net-net met 40-36 gewen. Foto: Ebenezer Titus
DIE eerste rugbyspan van Collegians het Saterdag (10 Mei) sy vyfde oorwinning in ’n ry behaal deur Beaufort-Wes met 26-8 te verslaan in ’n SWD Presidentsliga-wedstryd op Beaufort-Wes.
Collegians se drieë is gedruk deur Danovan le Roux (vleuel), Bertram Hendricks (skrumskakel), Michael Jonkers (slot) en Evano Holley (plaasvervanger-flank). Roberto Botha (heelagter) het drie drieë verdoel.
Beaufort-Wes het een strafdoel en ’n onverdoelde drie behaal.
Collegians is nou derde op die Karooliga-punteleer met Willing Hearts van Prins Albert in die eerste plek en Harlequins in die tweede plek.
• Collegians speel môre-aand (Vrydag) van 19:00 teen Willing Hearts op die Bridgton Sportgronde.