Goed … Beter… Pasta!

Ons vars Tagliatelle word hier met ’n varknek-ragu bedien.

PASTA bly een van die wêreld se mees toeganklike disse. Byna elke land het sy eie unieke weergawe van hierdie goedkoop en gewilde stapel-voedsel.

In Duitsland en Hongarye eet hulle spätzle. In Griekeland orzo. In Pole geniet hulle klein gevulde pastabeursies genaamd pierogi. In Israel, kreplach.

En terwyl die meeste van ons aan pasta dink as tradisioneel Italiaans, stam dit heel moontlik van antieke Asiatiese noedels af. ’n Algemene opvatting oor pasta is dat dit gedurende die 13de eeu deur Marco Polo uit China na Italië gebring is.

Om self jou hand aan die maak van vars pasta te slaan is ’n absolute moet vir elke aspirant-sjef. Dit is veel makliker as wat meeste mense dink, erg vermaaklik vir oud en jonk en die bedienings-moontlikhede is eindeloos.

Meel en eiers vorm die basis – 100g meel vir elke eier. Maak jy pasta vir ses mense, gebruik jy eenvoudig 600 g meel en ses eiers.

Lekker groot eiers van vrylopende hoenders is altyd die beste, en die beste meel om te gebruik is ‘00’, of doppio zero soos dit in Italiaans genoem word. Die Italiaanse graderingstelsel sluit 2, 1, 0 en 00 in. Tipe 2 is die grofste gemaal en sluit gevolglik die meeste kiem en semels in. Hoe laer die syfers word, hoe fyner word die meel en hoe meer van die kiem en semels word verwyder. Dubbelnul-meel is dus die fynste; die tekstuur is sysag en soortgelyk aan babapoeier.

Hierdie tipe meel is egter nie altyd maklik op die platteland verkrygbaar nie, so gebruik eenvoudig goeie ou all-purpose Snowflake as jy wil.

Die beste manier om pasta uit te rol is natuurlik met ’n pastamasjien. Sou jy egter die gelukkige eienaar van ’n pastamasjien wees, het jy heel moontlik glad nie hierdie pasta-advies nodig nie.

In die foto’s gebruik ons wel ’n pastamasjien, maar vir diegene wat nie een besit nie, kan die pasta met met ’n koekroller (of selfs ’n wynbottel!) uitgerol word.

Metode:
Op ’n droë werksoppervlak, meng die geklitste eiers en die meel met jou hande todat die deeg ’n gladde, ronde bal vorm wat nie meer aan jou hande óf aan die werksoppervlak vassit nie. (Foto’s 1 tot 3)

Die deeg moet steeds elasties wees. As die deeg te nat of te droog is, voeg eenvoudig nog bietjie eier of meel by. Draai die voltooide deegbal in kleefplastiek toe en laat rus vir ’n uur in die yskas. (Foto 4)

Sny die deeg in kleiner porsies en rol dit uit tot ’n dikte van sowat 6 mm. (Fotos 5 & 6)

Sny nou hierdie pastavelle in dunner repies om Tagliatelle te vorm, of gebruik hulle net so as Lasagne-velle of om gevulde pastabeursies (Ravioli) van te maak. (Foto 7)

Blansjeer jou pasta in vinnig kokende soutwater totdat dit vir jou gaar genoeg proe, maar onthou altyd dat al dente (gekook maar steeds ferm) pasta die ideale tekstuur aan jou pastadis sal verleen.

Volgende week maak ons Escargot Ravioli – ’n pastabeursie gevul met ’n knoffel-slak. Tot dan, buon appetito! En onthou om vir ons foto’s van julle heerlike pastadisse te stuur. (Deur Robert Koen)

7. Hang jou pastastringe oor ’n raam totdat jy hulle kook. Foto’s: Robert Koen

Baie fyn meel, groot eiers van vrylopende hoenders en ’n pastamasjien is ideaal vir die maak van vars pasta, maar die deeg kan ook met ’n koekroller of wynbottel gerol word.