Mosie van wantroue terwyl koalisie krimp

DIE koalisie wat die Groter Oudts­hoorn se raad beheer, het verlede Vrydag verder verbrokkel toe die Patriotic Alliance (PA) ook bande met die koalisie gebreek het.

Einde verlede jaar het Oudtshoorn Gemeenskapsinisiatief (OGI) ook aan dié koalisie onttrek.
Met die verlies van die raadslid van OGI en die raadslid van die PA bestaan die huidige regerende koalisie slegs uit 13 van die 25 raadslede – die ANC se agt raadslede, twee raadslede van Icosa en een elk van Good, Saamstaan en Advieskantoor.

Mosies van wantroue in die burgemeester, Chad Louw (ANC), die onder-burgemeester, Vlancio Donson (Icosa), en die speaker, Sonia Bentley (Good), is na verneem word ook intussen ingedien vir stemming by die volgende raadsvergadering.

Dit is egter geen uitgemaakte saak dat die wan­trouemosies tot same­werking tussen opposisiepartye en ’n bewindsverandering op die dorp sal lei nie, ondanks talle bespie­ge­lings die afgelope week in dié verband.

Onrealistiese eise van klei­ner partye mag glo in die pad van so ’n ooreenkoms staan.

Vrae oor werksessie in Mosselbaai
Daar was vandeesweek ook vrae oor ’n byeenkoms van raadslede van die Gro­ter Oudts­hoorn verlede Woensdag en ’n gedeelte van Donderdag (23 en 24 Februarie) by The Point Hotel in Mosselbaai. Volgens die waarnemende munisipale bestuurder, Walter Hendricks, was die besoek aan die hotel ’n spanbousessie van die re­ge­rende koali­sievennote met vier amptenare wat hulle vergesel het.

“Daar was ’n volledige program en die uitkoms­te sal aan die raad voor­gelê word. Weens die aard van die spanbou was dit raadsaam om dit buite die grense van Oudtshoorn te hou.”

Aanvullingsbegroting goedgekeur
Die raad het intussen Maandagmiddag sy aanvullingsbegroting eenparig tydens ’n spesiale raads­verga­­­dering goedgekeur.

Dit was die laas­te dag waarop munisipaliteite hul aanvullingsbegrotings vir 2022 kon goedkeur. (Deur Liesel le Roux)

1 Comment on "Mosie van wantroue terwyl koalisie krimp"

  1. Willie Coetzee | 04/03/2022 at 17:31 |

    Oudtshoorn se Raadslede moet leer dat Party Politiek moet vermy word tussen verkiesings. Dit is niu tyd om hande te vat en elke goeie voorstel as n eenheid in diversiteit deur te voer. Ware Leierskap is nou nodiger as ooit.
    Hou op toelaat dat Nationale en of Provinsiale Leierskap ons dorp beheer. Dien jul Gemeenskap. Dit is waarvoor ons julle verkies het.

Comments are closed.